06.12.2017

För den Schrievdisch

Water, Dieken, Reetdackhüüs, dat platte Land – all de Biller, de een vun dat plattdüütsche Land in’n Kopp hett, finnt een in düssen Klenner. De meisten hett Silke Hars in Schleswig-Holsteen opnahmen.

För jeedeen Maand gifft dat een Blatt. Dat Oog söcht dat Bild, jümmers in feine Klören. Dor blangen, an de rechte Kant, is en Snack oder en Seggwies to lesen – in’n Januar geiht dat los mit: „Laat susen, laat weihn, de Welt mutt sik dreihn“. Ünner Bild un Snack steiht dat Kalendarium, un dorünner steiht, woneem dat Bild maakt worrn is un wokeen dat knipst hett. Man harr sik wünscht, dat düsse Saken in en plattdüütschen Klenner ok op Platt afsett worrn weren.

Opfallen deit dat lütte Format. Man mit 15,3 x 10,3 cm is de Klenner to’n Opstellen passlich för jeden Schrievdisch.

De Plattdüütsche Kalenner 2018. Cobra Verlag 2017.
ISBN 978-3-937580-87-6