01.08.2018

För de Schoolklassen 3 un 4

Wöör, Dialogen, lütte Vertellen to’n Rögen, Speelstücken, Wöörbook – dat sünd de fief Kanten, de in jeedeen vun de acht Lexen vörkaamt. An so’n Struktur köönt sik de Schoolmesters jüst so fastholen as de Schölers. Snacken steiht vörnan, man ok dat Lesen warrt inöövt. Methodisch is dat so, dat de Lexen nich een op dat anner opboot. Wenn dat Thema „Weer“ ansteiht, kann ik also düt Stück vörtrecken.

Dat Book maakt dor wieder, wo „Platt löppt. Für Einsteiger“ anfungen hett. Hier geiht dat üm: School, grote Tahlen, Freetiet, Frünnen, Geboortsdag, Geföhl, To Huus, Üm’t Huus ümto, Inkopen, Eten un Drinken – Middageten, Tiet, Weer, up’n Buernhoff.

Edith Sassen kümmt mit allens, wat se in ehr Lehrwark tohoopbringt, direktemang ut de Praxis. Se weet, mit wat för Themen un wat för’n Humor se bi Grundschoolkinner ankamen kann, un se hett sik en Barg Opgaven utdacht.

Edith Sassen: Platt löppt. Für Einsteiger 2. Isensee: Oldenburg 2017, 69 S.

ISBN 978-3-7308-1387-4