28.09.2018

För de 3. un 4. Klass

Op düt Book hebbt Schoolmesters un Schoolmesterinnen töövt: Dat Lehrbook mit Emma un Paul, mit de tohoop de Kinner ja al dör de eersten beiden Schooljohren lopen sünd. Wat nee is: Hier gifft dat Leesstücken, man bavenan steiht jümmers noch dat Snacken un Verstahn.

Dat Book passt to Kinner vun 9 oder 10 Johr: Bunte Klören, allens is goot to kennen, man ok de Themen un wat ut de maakt warrt. In 16 Lexen geiht dat üm Natur un Technik, den Minsch an sik un dat Leven mit annern. Vörn steiht jümmers dat „Opwarmen“, dor snackt de Kinner över dat, wat se op en Bild seht. Bi „Snacken“ leest de Kinner Dialogen (un maakt dor mehr vun). Basteln, malen un annern Kraam to doon gifft dat bi „Do mal wat“. Enkelte Wöör un Woortfelder kann een sik ankieken ünner „Wöör bruken“. Un denn kümmt noch „Öven“ un „Lesen“. Dat een oder anner Stück kann een sik ok in’t Internet anhören, wo een ok Arbeitsblääd un annern Kraam finnen kann.

Dat Book kann sik sehn laten. Nich ganz kloor is, wat dat heten deit, wenn in’t Impressum steiht: Sprachlich orientiert sich das Lehrbuch am Wörterbuch „Der neue Sass“ und an der „Plattdeutschen Grammatik (Sass)“. Wenn dat üm dat Schrieven geiht, denn fallt op, dat nich jümmers de Formen utwählt worrn sünd, de Sass as Hauptindrag ansett.

Paul un Emma un ehr Frünnen. Redaktion und Text: Marianne Ehlers, Robert Langhanke und Karen Nehlsen unter Mitarbeit von Ernst-Günther Blunck-Brandtner, Thorsten Börnsen, Oliver Eumann, Ingwer Oldsen und Dörte Voß. Illustriert von Nicola Ashtarany. Hamburg: Quickborn-Verlag 2018, 175 S.

ISBN 978-3-87651-449-9