23.11.2017

En Leven mit Kabeljau un Rootboors

Herbert Hinkelmann hett sein Levensgeschicht opschreven. Soltwatergeschichten, de so wohr sünd as dat Leven sülvst. Dor kümmt dat weniger op Spannung oder Pointen an. Bavenan steiht en Minsch, de sik in de DDR en Arbeit utsöcht harr, bi de he en Stück vun sien Droom vun de grote wiede Welt ümsetten kunn.

De Schrieversmann, to den an Boord all blots Rollo seggt, nimmt uns Lesers mit an Boord vun Kutters un Fischdampers, op de he twüschen 1959 un 1989 ünnerwegens ween is. Wi lehrt de anner Lüüd un jümehr Macken kennen. Wi arbeit mit jüm tohoop, wi beleevt de Freid, wenn de Büdel vull mit Heern oder Makrelen an Boord hievt warrt. Wi dükert in en Welt in, bi de de Hools den Levenstakt vörgeven doot.

Veel Arbeit, geern ok en lütten Jux dorbi, un en däägten Sluck dröff ok nich fehlen. Fröher hett sowat „oral history“ heten – also dat, wat een vun sien Leven vertellt (un he vertellt lang nich allens), wo em dat op ankümmt. Wat de Mann de Bericht gifft, is jümmers liekut, dor is nix „lögenhaft to vertellen“ an. En gode Handvull Fotos steiht för düsse Oort vun Dokumentatschoon, de 2015 al op Hooch rutkamen is.

 

Herbert Hinkelmann: Fischersmann mit Liew un Seel. Erinnerungen an miene Fohrenstiet. Vertrieb: BS-Verlag : Rostock 2017, 209 S.

ISBN 978-3-86785-407-8