11.12.2019

Dubbelpack ut Eckernför

Wenn twee Lüüd in Eckernför wahnt, denn mag dat woll angahn, dat se tohoop en Book schrievt. De een is en Fro, de anner en Mann. De een wat öller, de anner meist 20 Johr jünger. Kloor, dat de ok dör ünnerscheedliche Brillen op uns Alldag kieken doot. Vertellen köönt se beid, jeedeen op sien Oort.

Udo Bielenberg hett üm un bi 30 plattdüütsche Böker rutbröcht. För em sünd Minschen wichtig: Marie un Johann, de sik egaalweg kabbeln doot, verdreihte Lüüd un wat de so beleevt. Un: Wat heet dat egens, wenn een öller warrt?

För Christel Fries is dat dat eerste Book. Se vertellt vun sik sülvst: vun ehr Kinnertiet, vun Minschen, de ehr in de Mööt kamen sünd, un vun Stine. Denn Christel Fries is Stine. Jedenfalls löppt se för de Touristen (un nich blots för de) mit de Sprottenkoor dör de Stadt. Un in so’n Rull kannst en Barg beleven.

Udo Bielenberg und Christel Fries: Lüüd vun ganz egen Slag. Plattdüütsche Vertelln. Husum : Husum Druck- und Verlagsgesellschaft. 2019, 142 S.

ISBN 978-3-89876-975-4