18.02.2019

De schrifft, de blifft

Dat sünd kene Geschichten un Gedichten, de an een Faden langsloopt. Dat is vun hier un vun dor, vun düt un vun dat: Vun Hamborg un ut Afrika, vun uns Tiet un vun Wiehnachten, un denn noch Poesie. För Bolko Bullerdiek sünd dat de Eckpunkten vun sien Leven vundaag. Un dor gifft dat eben mehr as een Linie, dor sünd dat de velen ünnerscheedlichen Haakpunkten, de di de Richt geevt, ok so’n, de egentlich nich goot tohoop passt.

Bolko Bullerdiek nimmt siene Lesers mit in en vertrackte Welt, de een sik Stück för Stück tohoopsetten mütt. Dor passt denn ok de Buddelbreven mit to, de sik twee Schrieverslüüd toschickt. Un een kriggt nie recht faat, wat nu de Wohrheiten, wat dat Nadenken un wat de Mallheiten sünd. In de Gedichten: Veel Geföhl, en beten Vundaag, en beten Geweten.

Bi’t Lesen bruukt een Tiet. Denn dat sünd lütte Kunststücken. Jeedeen Text för sik un op sien Oort. Dorto passt dat lütte Format (11,1 x 17,3 cm).

Bolko Bullerdiek: Buddelbreven. Vertellen un Gedichten. Quickborn-Verlag : Hamburg 2018, 183 S.

ISBN: 978-3-87651-454-3