06.11.2018

De Klassiker ut Westfalen

Augustin Wibbelt – sien Naam steiht för de westfäälsche Literatur in de eerste Hälft vun dat 20. Johrhunnert – en kathoolschen Pfarrer, de mit so veel Biller, so veel Rindenken un so veel Spraakkraft vertellen kann: vun de Natur un vör allen vun de Mischen.

Un Wibbelt hett uns ok vundaag noch en Barg to vertellen. Bi’t Lesen markt een, mit wat för’n Spaaß de Mann sik de Lüüd ankeken hett un denn dor denn siene Vertellen ut maakt: „Schulte-Brieliäppels wören ungeheier fiene Lüde“ – in so’n Satz stickt al de hele Geschicht binnen. Un jümmers wedder Wibbelt sien Tiet, mit den eersten Weltkrieg oder de Sozialdemokraoten in Holldrup.

De Leesbook-Reeg vun Nyland steiht för Qualität. As Rutgevers hebbt Robert Peters un Elmar Schilling, Vörsitter un Geschäftsföhrer bi de Augustin Wibbelt Gesellschaft en seker Hand hatt: Vörn steiht de Lyrik (un dat Pöggsken is dor ok mit bi), denn kaamt Vertellen un an’t Enn noch en lütt Afdelung „Sprache und Heimat“.

Lesebuch Augustin Wibbelt zusammengestellt und mit einem Nachwort von Robert Peter und Elmar Schilling. Köln: Aisthesis Verlag 2018, 167 S.

ISBN: 978-3-8498-1271-3