05.10.2017

Dä’t lever nich doon

Een de nich allens mitmaakt. De sien egen Kopp hett un stuur sien Weg geiht – ok denn noch, wenn dor gor keen Weg mehr to sehn is. Dat is Bartleby, en jungen Mann, de in Nee York Arbeit bi en Avkaat finnt, de en Schriever söcht hett.

Herman Melville harr jüst sien „Moby Dick“ trecht, as he düt Stück to Poppier bröcht hett: Dat Vertellen vun den snaakschen Schriever, de eerst heel un deel in sien Arbeit opgeiht, denn aver anfangt mit dat Nee-Seggen. Un de nich mehr vun sien Kurs aftobringen is. Lüüd, de eenfach nich mehr mitspeelt – dat Thema is vundaag jüst so frisch as vör 160 Johr.

Goot twintig Johr is dat her, dor hett Rainer Kramer „Animal Farm“ un „Dat Dschungelbook“ op Platt rutbröcht. Sien Platt is ut de Lümborger Heid, un wat he opschrifft, kümmt in en egen Schrievwies vör Dag, Wöör un Sätz sünd faken nich allto wiet weg vun dat hoochdüütsche Vörbild. Dat maakt dat Lesen nich jüst eenfach. De aver en Stück Weltliteratur op Platt to Hand nehmen will, de schall sik geern dör düt balstürig Vertellen dörarbeiden.

Herman Melville: Bartleby up Platt. Von Bartleby, den Afschriever von Wall Street. Nedderdüütsch von Rainer Kramer. To bestellen bi: kauwesrainer@yahoo.com

ISBN 978-3-00-056381-2