22.10.2018

Buddeln, buddeln, buddeln

Wat is dat gröttste för so’n Mullwarp? Kloor doch: Buddeln – mit de Hannen, mit en Schüffel oder ok mit en Bagger. Dat is de Geschicht, de Paul-Eberhardt Schernich in Biller in Riemels vertellt.

De Comic-Geschicht (anner Lüüd seggt dor Graphic Novel to) hett Paul-Eberhardt Schernich sik utdacht. De Student (Schoolmester will he warrn för Engelsch un Eerkunn) hett ok de Biller tekent. He hett al sien egen Stil funnen, un he kriggt dat hen, sien egen Billerwelten to wiesen. De Biller sünd swatt-witt. Un den dat nich langt, kann jüm ja geern anmalen. De Geschicht is ok al op Engelsch rutkamen as „Maura the Mole“.

Den plattdüütschen Text hett sien Mudder opsett, de beter as he in Platt to Huus is. Un dat hett se mit veel Plie maakt. De Spraakkraft wiest sik ok an’t Enn vun de Geschicht, wo dat heten deit: „Dien Leven is dat, wat du sülms dor ut maakst. Wenn’t vorbi is, denn is dat to’n Jaulen to laat. Du Hest’t inne Hand, wat du biesterst or jaagst, Or du in dien Leven ok Freid kriggst tofaat.“

Paul-Eberhardt Schernich: Mieke Mullworp. Berlin : Verlag am Turm 2018, o.S.

ISBN: 978-3-945130-13-1