30.04.2019

Bevensen 2018

„Allens kloor – Bämsen 70 Johr“ – dat weer dat Motto vun de 71. Bevensen-Dagfohrt 2018. As Afscheed vun dat Amt as Vörsittersch hett Ingrid Straumer de Versammlung en Vördrag schenkt över 70 Johr Bevensen: Op wat wullen se 1948, glieks na den Krieg, los, wat weren un wat sünd de Haupt-Figuren un wat för Ideen harrn de, wat is anners worrn mit de Tieden, för wat steiht Bevensen vundaag? Un wat Ingrid Straumer schrifft, dor stickt veel Insicht un ok en beten Utsicht binnen.

Dat Literarische Kleebatt hett sik wedder veer nee’e plattdüütsche Böker vörnahmen. Nich jümmers kaamt se mit dat, wat se goot finnt oder wat se to bekriddeln hebbt, op den Punkt – man wo dat eernsthafte Literaturkritik annerwegens al meist gor nich mehr gifft, is düsse Programmpunkt üm so wichtiger. Nalesen kann een nu ok, woso Klaas-Hinrich Ehlers den Johannes-Saß-Pries verdeent hett. Un wat de Welle-Nord-Mann Werner Junge to „Platt in’t Radio“ to vermellen hett.

De Bevensen-Dagfohrt 2019 is vun’n 20. bet to’n 22. September 2019. Denn hett Marianne Ehlers as de nee’e Vörsittersch dat Leit.

 

„Allens kloor – Bämsen 70 Johr“. 71. Bevensen-Dagfohrt. Jahrestagung für Niederdeutsch. 14. – 16. September 2018 in Bad Bevensen. Bad Bevensen [2019], 211 S.