15.03.2019

As dat Leven speelt

Gifft ja Lüüd, de beleevt egalweg wat – mit de Naverslüüd, in de Familie oder bi’t Schützenfest in Esens. Manfred Briese hett so’n Begeevnissen opschreven, meist nich länger as een, twee Sieden: „Dat löppt, as’t lopen sall“. Wat dorbi rutsuert, is en Spegel vun uns Tiet, vun dat, wat för uns tellt, un dat, wat gor nich geiht.

Dat is in dree Johr dat drüdde Book vun Manfred Briese. Wedder mit Vertellen un Gedichten. He kickt nich veel na de Dramaturgie, na Spannung oder Pointen. Nee, he kickt na de Minschen, lett jüm in Dialogen sülvst snacken un boot Brüggen na jümehr Sicht op de Welt.

Manfred Briese nimmt all Geföhlswelten mit: Verleevt-Ween, Fründschap, Bangigkeit, Krankheit, Dood, Truer. Un wat he doröver schrifft, dat stimmt.

 

Manfred Briese: Un de Hund fleit La Paloma. Plattdüütse Geschichten & Gedichten. Emden : Diesel Verlag 2018, 200 S.

ISBN: 978-3-934835-35-1