16.01.2019

An’t Enn: Dat hett sik läppert

Nu sünd se al Geschicht – „De Fofftig Penns“ (oder as se sülvst seggt: de spackigste vun de Spackenbands) hebbt sik an’t Enn vun’t Johr 2018 oplööst. Twee gewaltige Kunzerten hebbt se noch in Hamborg un Bremen speelt – un denn weer daddeldu. Dat se nu noch 15 Leder in 17 Versionen op CD un Schallplatt rutgeevt, dor warrt sik plattdüütschen Hipp-Hopp-Verdreihten bannig to freien.

In dat CD-Book steiht binnen: „De fofftig Penns weern, sünd un blievt Malte Battefeld, Jacob Köhler un Torben Otten.“ Över de Johren hebbt se sik den een oder anner Matroos mit an Boord haalt. Un so is ut de fröhen Beats en satten Sound worrn. Wat se vun Anfang an alleen maakt hebbt, dat sünd de Texten: Geniale Brabbelgeschichten („Bruukt keen LSD, wi drinkt Büntig Tee“), dörweiht vun Noorddüütschland, Jugendspraak un Hipp-Hopp-Släng („Dat ik undissbor bün, steiht schreven in de ölven Geboden“).

Wat blifft: „De Fofftig Penns“ hebbt de Welt wiest, dat frische Musik op Platt allerbest afgeiht. Dat gifft Stücken, de kriggst bi’n besten Willen nich wedder ut’t Ohr rut, as „Löppt“ oder „Ik mutt gor nix“. De CD is in’n Dezember 2018 rutkamen, de Schallplatt kümmt an’n 18. Januar 2019 op’n Markt.

Dat läppert sik. Dat Beste vun de Fofftig Penns. groove attack 2018.
EAN 4-250859-200724