15.02.2018

Ade bet Wenke

In Noorddüütschland gifft dat en Reeg Namenlandschaften. Een dorvun is Noordfreesland. Wat dat dor an Vörnamen gifft, ut wat för en Spraak de kaamt un wat se bedüden doot, dat finnt sik allens in düt handliche Book.

Kai un Kathrin gifft dat meist överall, man woans steiht dat mit Kaatje, Kerrin, Kreske un Krinke? In en Tiet, in de de Kinner nich mehr all Elke un Hans heten schüllt, mööt de Öllern gor nich in anner Kulturen rinkieken – se köönt ok bi uns to Huus Namen finnen, de nich so begäng sünd. Namen sünd en Stück Kultur. Un wenn de Kultur leven schall, denn mööt de Namen wiedergeven warrn. Dorför mütt een de aver eerst mal kennen.

In den tweten Deel sünd Familiennamen oplist. Dor gifft dat gor nich so veel vun. Dat liggt ok doran, dat dat bet Anfang vun’t 19. Johrhunnert in de meisten Gegenden vun Noordfreesland gor kene „richtigen“ Familiennamen geev.

Antje K. Arfsten und Inga Werth: Nordfrieslands Namen und ihre Bedeutung. Verlag Norfriisk Instituut Bräist/Bredstedt 2017, 83 S.

ISBN: 978-3-88007-418-7