25.02.2019

Adboor Fritz

Geschichten vun den Adboor höört all Kinner geern. Vun Fritz, de mit sien Fro Undine vun Vörjohr bet Harvst sien Nest in en Dörp in Mäkelborg hett, vertellt de Klappergeschichten, de för junge Minschen vun 3 bet 8 sünd. Kloor, dat de Vagels de Minschenspraak köönt. Un ok kloor, dat se grode Frünnen vun de Kinner sünd.

In dat eerste Book (2016) köönt wi nalesen, wat de Adboor un sien Familie in een Johr so allens beleevt: Nest boen, op de Eier oppassen, Eten för de Lütten ranhalen. Un twüschendor de Kinner in’t Dörp helpen. Een vun de Kinner is Mustafa – un na sien Familie in Afrika fleegt Fritz un Udine in dat twete Book. Wat se dor allens beleevt, dat vertellt se in dat twete Book.

Toeerst sünd de beiden Klappergeschichten op Hooch rutkamen, af un an schient dat so’n beten dör. De plattdüütsche Schrievwies leest sik nich jümmers licht: Varre steiht för Vadder, Murre för Mudder, Ponng’n för Poggen un sänng’n för seggen. Op de groten bunten Biller (DIN A4) kann een veel söken un wedderfinnen.

 

Michael Krämling: Klappergeschichten: Fritz dei Adebor. Illustriert von Dagmar Krämling. In’t Plattdüütsche översett vun Kuno Karls. Sülvstverlag 2016, 36 S.

ISBN: 978-3-942469-40-1

Michael Krämling: Klappergeschichten: Fritz upp Reisen. Illustriert von Dagmar Krämling. In’t Plattdüütsche översett vun Kuno Karls. Sülvstverlag 2018, 36 S.

ISBN: 978-3-942469-53-1

www.andrebuchverlag.de