24.01.2014

Wilhelmine-Siefkes-Pries an Gerd Brandt

De eerste Platt-Preis 2014 geiht an Gerd Brandt

Vundaag kriggt de Muskant Gerd Brandt den Wilhelmine-Siefkes-Pries. De meisten kennt em as „Balu“. Mank de plattdüüschen Muskanten is Balu en echten Dino. Al in de 70er Johren hett he mit sien Gitarr op de Bühn stahn. 1979 hett he mit „Laway“ sien egen Band grünnt.

Gerd Brandt sien Leven is Musik. Minschenfründ un neeschierig as he is, hett he vele Saken utprobeert, meisttiets is dor wat bi rutkamen, wat de beste Oort vun Volksmusik is: Mit Traditschoon, man jümmers ok mit beide Been in uns Tiet. Düsse Daag is Laway mit „Winterleed“ op Tour – twüschen Düsseldörp, Greetsiel un Bremen. An’n 25., 26. un 27. Januar is he mit dorbi, wenn Muskanten un Autoren to’n Gedenken an den Holocaust dat Programm „As de Gotteshusen brannt hebben“ opföhrt.

Den Wilhelmine-Siefkes-Pries gifft de Stadt Leer ut. Nu al dat sövente Maal. De Naam vun düsse Autorin wiest op plattdüütsche Kultur un op dat soziale Geweten. Dat Schrieven, Gestalten, Vördregen, Kreativ-ween geiht bi ehr tohoop mit den Blick för de, de in’n Achtergrund staht, de ehr Stimm man liesen is.

De Fierstünn richt de Stadt in den Kaisersaal vun dat histoorsche Raathuus in Leer ut. Carl-Heinz Dirks verkloort, mit wat Gerd Brandt den Pries un de 2500 Euro ver-deent hett. Anfangen deit dat vunavend Klock halvig acht.