29.10.2017

Nummer een: De Winnewupps

Plattsounds 2017 mit veel Hardrock!

"De Winnewupps" - so heet de Rock-Metal-Band, de den Bandwettstriet 2017 wunnen hett. Banning luut güng dat to in de CD-Fabrik in Celle. Negen Speelkoppeln un twee enkelte Sängerinnen hebbt an'n 28. Oktober wiest, dat junge Musik un Platt al lang allerbest tohooppassen doot. Un wenn dat in dat Leed ok noch um dat lütte Deert geiht, dat so geern den Rasen opwöhlt un wo de Lüüd in anner Gegenden Mullwarp oder Mullewupp oder anners wat seggt, denn is ok kloor, dat sik Lock op Stock riemelt un bi de Musik de Wand wackelt.

Dat weer al de sövente Dörgang vun Plattsounds. Dütmal harr de Lümborger Landschaftsverband den Hoot op. In't Publikum harr een sik den een oder annern jungen Tohörer mehr wünscht. Man ok dat is wohr: De Ölleren, de dor weern, hebbt sik freit to en plattdüütschen Kunzertavend, mit den se villicht gor nich rekent harrn, to Annie Heger, de as Moderatorin goot dör all de Pausen för den Umbo op de Bühn hendör stüer un to "De Winnewupps", de ehr Levensgeföhl wunnerbor in Freid an Musik ümsett hebbt. 1000 Euro weer de Pries, bavento ok noch en Coaching. Denn ok dat is kloor: De jungen Muskanten köönt noch veel dortolehren.

Tokamen Johr geiht dat wieder mit Plattsounds. Denn löppt dat Spektakel in Leer!