07.03.2018

Dat 1. Platt-Zertifikat för en School in Bremen

An'n 7. März is de Grundschool Schönebeck amtlich as "Plattdüütsche School" zertifizeert worrn. Se is de eerste School in Bremen, de so'n Zertifikat kregen hett.

Wenn een in de School rinkümmt, kann een de meisten Saken in twee Spraken lesen: op Hooch un op Platt. Dat School-Radio sennt op Platt, un bi't Wettlesen hebbt all Kinner bannig veel Spaaß. Achter de Idee vun de "Plattdüütsche School" steekt de Rektorin Britta Riethmöller un ehr Stellvertretersch Myriam Kolbe. In'n Sommer 2017 hebbt all Schoolmesters vun de Grundschool ut Bremen-Nord bi en Lehrerfortbildung mitmaakt - dor harrn se sik de Lüüd vun dat Institut för nedderdüütsche Spraak ranhaalt.