20.06.2019

Wöör, Seggwiesen un Vertellen

In Gartz an de Oder snackt se jümehr egen uckermärkisch Platt. De Egenoorten vun düt Platt will Inge Wolff fastholen un wiedergeven. 650 Wöör hett se över de Johren sammelt. De meisten kennt wi so in’t Hoochdüütsche nich, man vele gifft dat ok in anner plattdüütsche Gegenden. Dorto kaamt denn Snacks, de na Themen sorteert sünd, un en Handvull Sagen op Platt un Hooch.

Översichtlich is fett dat plattdüütsche Woort druckt, un denn in normal de hoochdüütsche Verkloren; vun de Grammatik steiht dor nix: fienmülig  anspruchsvoll beim Essen; klüten  werfen; Spindmus  schmächtiges Kind. Bi de Seggwiesen steiht de plattdüütsche Form in de eerste Reeg, denn warrt Woort för Woort översett, un in de drüdde Reeg steiht, wat dat bedüden deit: He strüüwt sik as’n Borchfarken.  Er sträubt sich wie ein männliches junges Schwein.  Er wehrt sich gegen etwas.

Dat Platt in Gartz wedder op de Been kümmt, dor glöövt Inge Wolff nich an. An’t Enn vun dat Book schrifft se: „Nun wird es bei uns bald aussterben – und keinen kümmert das. Ist das anderswo anders?“

 

Inge Wolff (Hrsg.): Kleinveeh mökt ook Mess. Wörterbuch A bis Z. Gartzer Plattdeutsch-Hochdeutsch (Uckermärkisch-vorpommersches Plattdeutsch). Redewendungen, Wetterregeln, Gartzer Sagen. Schwedt : Verlagsbuchhandlung Ehm Welk 2018, 102 S.

ISBN: 978-3-943487-59-6