15.06.2017

Vun en plietsche Hummel

Pummel Plüschmoors kümmt en ganze Reeg Deerter in de Mööt. Jeedeen vun jüm hett en Droom, man is sik seker: Dat kann ik nienich schaffen. Avers Pummel is plietsch; se weet: "Geiht nich, gifft't nich!"

Pummel kennt en Geschicht, de se all Deerter vertellt. As se jüm een Week later noch mal wedder besöcht, dor süht de Welt al ganz anners ut. De Geschicht maakt Moot an sik sülvst to glöven, un sik vun keeneen seggen to laten, wat geiht, un wat nich geiht.

Dat plattdüütsche Kinnerbook is passlich to't Vörlesen un Ankieken; to de Geschicht gifft dat bunte Biller vun de Hummel un all de anner Deerter antokieken. An't Enn vun't Book is ok de hoochdüütsche Översetten vun de Geschicht to finnen.

Schull dat en twete Oplaag vun dat Book geven, weer dat goot, den Text noch mal nipp un nau antokieken; hier un dor hett sik de een oder anner lütt Fehler insleken.

Böhling, Dirk: Pummel Plüschmoors oder Geiht nich gifft't nich! Eine kleine Hummel entdeckt die Welt. Bremen : Bremer Tageszeitungen AG 2017. ISBN 9783938795583