09.03.2018

Vun em un ehr

Wenn een över de 65 rut is, kann he en Barg ut sien Leven vertellen. Vun anner Lüüd un vun sik sülvst, vun dat, wo he mit bi weer, un vun dat, wo he sik so siene Gedanken över maakt. Un so kummt för en Book en bunten Struuß an Gedichten un Geschichten tohoop.

De Verteller vun de Geschichten is en heel un deel normalen Alldagsminsch, een, de in de DDR groot worrn is. He hett klore Vörstellungen vun Mann un Fro, vun de Arbeit un de Kollegen, de Familie oder dat Fohren mit de Düütsche Bahn. So nimmt he de Themen op, de jüst begäng sünd, un vertellt dorvun mit en Smuustergrienen.

Dat dat keeneen in den verkehrten Hals kriggt: Wolfgang Kniep hett kene Kottgeschichten na Hemingway sien Booplaan schreven. Nee, dat sünd ganz eenfach kotte Geschichten. De Teeknungen to dat Book hett Ede (dat steiht för Edeltraut) Kahl tostüert.

Wolfgang Kniep: Hür mi op! Kortgeschichten und Gedichten. BS-Verlag Rostock 2017, 159 S.

ISBN: 978-3-86785-403-0