27.06.2018

Vun de Siet kannst dat ok bekieken!

23 lütte Vertellen un twee Gedichten leggt Susanne Bliemel uns to’n Lesen op’n Disch. Dat jeedeen sien Last to dregen hett, wiest de Figuren kloor un düütlich. De Alldag is blots de Achtergrund för dat, op wat dat hier ankümmt: Op de anner Sichtwies, de de Welt nich op’n Kopp stellt, man de ehr en annern Dreih gifft.

Susanne Bliemel ehr Stimm kennt vele Lüüd vun’t Radio her. Siet Johr un Dag kümmert se sik üm Platt in de School. Leest hebbt wi vun ehr bet nu meist Kinnergeschichten. Un denn keem 2012 „Wenn de Gott oewer nu ’n Lock hett“ rut. Hier wiest sik en Schrieversch, de en Spannungsbagen opboen kann, de sik de Minschen nipp un nau ankeken hett un de en Geföhl hett för de Themen ut uns Tiet.

De Geschichten speelt in Gützkow, Stemhagen, Ribnitz, Sanitz, Griepswold oder Rostock Lichtenhagen, un af un an ruschelt in’n Achtergrund ok noch en beten vun de DDR. Geschicht höört eben dor mit to, wenn een Geschichen vertellt.

Susanne Bliemel: Dat wier de Nachtigall un nich de Uhl… Plattdeutsche Geschichten. Rostock : Hinstorff 2017, 111 S.

ISBN 978-3-356-02149-3