27.02.2020

Ut de Kark – för de Kark

„De Kennung“ – dat is de Tietschrift för Plattdüütsch in de Kark, un dat nu al in’t 42. Johr. Noch eben rechttiedig to dat Enn vun dat Klaus-Groth-Jubiläumsjohr is op dat Vörblatt vun dat Dezember-Heft 2019 is en Bild vun Groth to sehn. Dorto gifft dat en Artikel vun Heinrich Kröger över Groth un de plattdüütsche Bibel. Dat Stück is 1977 al mal in den „Quickborn“ un in de Johrsgaav vun de Klaus-Groth-Gesellschaft afdruckt worrn. Nu hett he dat opfrischt un an enige Steden nee maakt. Vun Belang sünd aver ok de beiden Breven vun Dieter Bellmann und Heinrich Kröger, de achter den Artikel staht. Bellmann schrifft: „Groth schrifft sülben een orig slecht Platt – in sien Vertellen - nich in sien Gedichten!! – he kümmt un kümmt von de hochdüütsche Syntax nich free.“

Denn gifft dat noch en biografischen Opsatz to Bernhard Trittelvitz (Karl-Heinz Sadewasser harr geern mal in de Literaturgeschicht kieken kunnt). Un Jochen Müller-Roselius nimmt sik „Widersprüche oder Dialektik in Werk und Leben von Johann D. Bellmann“ vör. An’t Enn vun den Essay steiht: „Marx und Engels haben die Theorie des Dialektischen Materialismus entwickelt – Bellmann gestaltet mit den künstlerischen Mitteln der Dichtung seinen Dialektischen Idealismus.“

Ut un för de Arbeit in de Gemeenden steiht dor ok noch wat binnen. Un över Minschen, de sik för Platt in de Kark insett. Un över ne’e Böker.

De Kennung. Zeitschrift für plattdeutsche Gemeindearbeit. 42. Jahrgang – Dezember 2019, 168 S.

www.plattduetsch-in-de-kark.de