02.05.2017

… sweevt as’n Fedder dör de Luft …

Al lang höört Boy Lornsen siene Stücken to de, de geern un veel vörleest warrt. Wat för en Spraakkraft stickt in „Sien Schöpfung“ binnen. Un ok in „Jesus vun Nazareth“. Nu endlich sünd beide wedder op’n Markt: Tohoopbunnen in een Book.

Goot 30 Böker hett Boy Lornsen schreven, de meisten dorvun op Hooch un för Kinner oder junge Lüüd – wokeen kennt nich „Robbi, Tobbi und das Fliewatüüt“? He weer al över 60, as he för sik dat Schrieven op Platt entdeckt hett. 1991 keem „Sien Schöpfung un wat achterno keem“ rut. Klassisch al de Anfang: „Mit rein gornix füng he an“. Dree Johr later harr he Jesus sien Geschicht in Spraakbiller un Riemels trecht. Ok düsse „Stremel Weltgeschicht“ weer flinkföötsch vertellt un hett wiest, mit wat för en Lust un Kraft Geschichen-Vertellen op Platt geiht.

Nu is Boy Lornsen al 20 Johr doot. Man siene Riemel-Stücken sünd so frisch as man wat: allerbest to’n Sülvstlesen, noch veel beter to’n Vörlesen. Man harr doröver nadenken kunnt, för dat nee’e Book an de Schrievwies rantogahn. De een oder anner mutt doch eerstmal nadenken, wenn he en Woort as „achtertüsch“ lesen deit.

Boy Lornsen: Vun Gott un Lüüd. Hamburg : Quickborn-Verlag 2017. ISBN: 978-3-87651-436-9