11.07.2018

Sing man to

Dat sünd dusende plattdüütsche Ledertexten, de Cord Denker bet nu schreven hett. He nimmt sik en bekannte Medolie – wat ja den Vördeel hett, dat vele mitsingen köönt – un dor finnt he denn de passlichen Wöör to. En Barg sünd Karkenleder, man anner singt vun de Natur oder de Minschen.

In düsse Utwahl mit 220 Leder finnt sik „Vom Himmel hoch“, „Oh du fröhliche“, man ok „Jingel Bells“ oder „In der Weihnachtsbäckerei“. Evergreens as „Amazing Grace“ un „Que Sera“ sünd jüst so dor mit bi as „Sloop John B.“ un „Mull of Kintyre“. Un sogor plattdüütsche Vörlagen hett Denker plattmaakt: „Anke von Tharau“, „Wo de Ostseewellen“ oder „Dat du mien Leevsten büst“.

Hier geiht dat nich üm hoge Kunst – hier geiht üm de Freid an’t Singen. In dat „Woord achtern“ schrifft Denker: „Weer doch ok schöön, wenn du mal merrn in een Karkenleed smuustern oder ok lachen kunnst.“

Cord Denker: Ünner wieden Heven. Plattdüütsch Leedertexten för Gott un Minschen, för Kark un Welt. De Kennung, Beihefte, 25. Münster : LIT Verlag 2017, o. S.

ISBN 978-3-643-13887-3