18.07.2019

Sachvertellen

Dat Krankenhuus is en egen Kosmos. Mit Minschen, Warktüüch un Regeln, de heel un deel anners sünd as in’t „normale“ Leven. Christoph Prang nimmt de Lesers mit in düsse Welt. He vertellt vun sik un dorvun, woans he Patschenten, Dokters un Plegers in de Nootfallmedizin, op de Intensivstatschoon oder annerwegens beleevt hett.

Dat is 40 Johr her, dor hett Dieter Bellmann verlangt, op Platt schullen mehr Sachtexten schreven warrn. Wat Christoph Prang to Poppeer bröcht hett, verbinnt den Sachtext mit dat autobiografische Vertellen. He kickt also weniger op den Afloop vun de Geschicht un ok nich op de technische Siet vun de Medizin. Hier geiht dat mehr dorüm, wat „Nich-Gesund-Ween“ mit de Minschen maakt.

Bi’t Lesen fallt op: Vele Sätz sünd na hoochdüütsche Vörbiller opschreven worrn. Man bi vele Wöör warrt faken en Form utwählt, de mit Willen anners is as allens, wat wi ok op Hooch kennt. Dat is nich jümmers licht, düt Schrift-Platt to lesen.

 

Christoph Prang: In de Nootopnahm. Beleevnisse ut Oostholsteen. verlag.marless.de 2019, 228 S.

ISBN 978-3-9819019-7-9