08.04.2020

Riemeldööntjes

Riemelversen hebbt op Platt en lange Traditschoon, de ok in’t 21. Johrhunnert lebennig is: to’n Vördregen bi Familienfiern oder to’n Högen bi Vereens-Versammlungen. Dor kriggt een to weten, wat twüschen de Minschen so allens löppt. An’t Enn kannst jedenfalls seggen: Stickt ok veel Wohrheit binnen.

Dat is al dat drüdde Book “Hoch un Platt” vun Ingrid Mattfeld. Hier nu mit söven plattdüütsche un dree hoochdüütsche Riemelstücken; twee längere Prosatexten sünd hooch. De plattdüütschen Stücken leevt vun dat fröhlich-klore Woort. De Rullen vun Mann un Fro sünd en beten wat ooltbacksch, man dösig sünd de Figuren nich. De Fro, de sik to ehren 90. Geboortsdag en jungen Mann in’t Bett haalt, hett dat fuustdick achter de Ohren.

To Huus is Ingrid Mattfeld in Drebber in den Kreis Deefholt, un vun dor hett se ok ehr süüdollenborger Platt, dat nich so licht to lesen is. De Teeknungen in dat Book hett de Schrieversch sülvst maakt.

 

Ingrid Mattfeld: Hoch un Platt – von beiden wat. Band 3. Mit Zeichnungen der Autorin. Geest-Verlag : Vechta 2019, 79 S.

ISBN 978-3-86685-734-6