04.07.2019

Redder, Brink, Kamp un Twiete

Stratennamen sünd en Spegel vun de Kulturgeschicht in de Region. För den Kreis Herzogtum Lauenborg wiest dat Helga Walsemann. Över Johren hett se de plattdüütschen Stratennamen dor opschreven, un denn hett se versöcht, den Sinn vun den Naam faattokriegen. Faken is dat licht to, as in „Katenstieg“ – man wat sturer süht dat ut bi „In de Lips“ oder „Am Ilensoll“.

Afdruckt sünd Listen mit all de Stratennamen in de 14 Ämter un Städte. Allens kloor un översichtlich. Un an’t Enn steiht en Reken: Woveel Perzent vun de Namen sünd (to’n Deel) Platt? Dat geiht vun 8,8 % in de Stadt Ratzborg bet 31,4 % in Sandesneben-Nusse. All tohoops sünd dat för den Kreis 22,5 %.

De bunten Biller vun de Stratenschiller maakt ut de drögen Listen en Book, dat een geern to’n Nakieken un ok to’n Ankieken in de Hand nimmt. Achtern gifft dat noch en Deel, wo wi wat to weten kriegt vun Minschen, de in Stratennamen afbillt sünd, as in „Amandas Garten“ oder „Gorch-Fock-Weg“.

 

Plattdüütsche Stratennamens in den Kreis Hertogdom Lauenborg. Arbeitsprojekt des Plattdüütsch-Forum Kreis Herzogtum Lauenburg unter Leitung von Helga Walsemann. Platt-TabelleN: Heinrich Querfurth. Straßennamen im Kreis Herzogtum Lauenburg nach Personen von Helga Walsemann. Rutgever: Plattdüütsch-Forum Kreis Herzogtum Lauenburg in Kooperation mit dem Kreis Herzogtum Lauenburg. Ratzeburg : 2019, 146 S.

Das Heft ist erhältlich bei den Plattdeutschbeauftragten des Kreises und der Ämter.