29.05.2019

Platt un Pleeg

Dat Plegen vun kranke un öllere Minschen is een Arbeitsfeld, wo de plattdüütsche Spraak ehren fasten Platz hett. Dat Heft „Weetst du noch?“ wiest Biller un Wöör, de een för dat biografische Arbeiden bruken kann: Op Dubbelsieden warrt 32 Themen afhannelt: Vun „Kinner baden“ över „Peer beslaan“ bet hen na „Johrmarkt“ un „Iesladen“.

Links op en Dubbelsiet steiht dat Bild, rechts 6 bet 12 Wöör. Un denn en lütten Sachtext dorto. Dat Ankieken vun de Biller ut ole Tieden bringt de Lüüd to’n Snacken. Se besinnt sik, vele weet nipp un nau, woans dat weer. In de Köök oder in en Goorn: Se hebbt dat noch in de Nääs un köönt dat föhlen.

Dat Ringbook döcht för de Praxis – ok wenn dat Poppier villicht en beten wat dünn is. Un bi de twete Oplaag schull een dorför sorgen, dat de Qualität vun de Biller beter warrt. Dor fehlt ok en Henwies, woneem een dat Heft bestellen kann.

 

Weetst du noch? Trüchdenken – Besinnen – Vertellen. Hrsg. v. Bundesraat för Nedderdüütsch u. Oldenburgische Landschaft. 2018 [2019].