31.07.2019

Platt lehren mit Oma

Wat en lütte Deern oder en lütten Jung mit Oma so allens beleven kann - un woans een dat op Platt beleven kann, dat wiest dat Heft vun Christl Twenhöfel. Op 12 Dubbelsieden warrt jümmers een Thema afhannelt: Links steiht wat to de Situatschoon: „Buten regent dat“ oder „Wi wöllt Koken backen“. Un rechts in bunte Klören goot teihn Wöör, de een dorför bruken kann.

Dat is na „Mit Oma snack ik PLATT“ nu al dat twete Heft vun Christl Twenhöfel, dat na desülvige Oort maakt is. Egentlich is so’n Heft för dat Kind dacht, dat vörn ja ok sien Naam rinschrieven schall. Man dat kann blots klappen, wenn dat Kind al lesen kann. Anners is dat mehr en Book för Oma.

De Wöör sünd in grote un bunte Bookstaven sett. Över enige Wöör kann een sik wunnern (Stoppstell), de meisten sünd na Saß schreven. Leider is nich kloor, woneem een dat Book bstellen kann.

Christl Twenhöfel: Op Besöök bi Oma. Selbstverlag : Geesthacht 2019, 36 S. (mit Einband).