30.05.2018

Platt in Woort un Film

Dat gifft Gegenden, wo de plattdüütsche Spraak al meist nich mehr dor is. Dor höört de süüdlichen Dele vun Westfalen mit to, vör allen dat Ruhrgebiet. In Grevel nu, dat is en Stadtdeel vun Düörpm (Dortmund), hebbt de Lüüd vun den Börger- un Heimatvereen seggt: Wi wüllt fastholen, wat vundaag noch dor is.

Dat geiht üm den Klang vun de Spraak, man ok üm Gedichten un Geschichten, de sik de Minschen fröher vertellt hebbt. Rutkamen is en Film, de meist 40 Minuten lang löppt. De enkelten Stücken warrt op Hooch ankünnigt, denn dat geiht ja dorüm, dat all Minschen, de nu in Grevel wahnt, dat annehmt un verstaht, wat dor vertellt warrt.

De Opnahmen sünd twüschen 2014 un 2016 maakt worrn. Lohnt hett sik düsse Dokumentatschoon op jeden Fall. Ok wenn dat Geveler Platt villicht verklingen mag – hier kann sik jeedeen dat Original anhören. Un dat is doch ok al wat.

Dat olle Platt. Dokumente eines aussterbenden Dialektes in Dortmund-Grevel. Hrsg. v. Bürger- und Heimatverein Grevel e. V. 2017.