07.08.2019

Nareist na Mentone

Jubiläum bi Klaus Groth: Wetenschaft, Dichterslüüd, Muskanten un vele annern fiert düt Johr Groth sien 200. Gebuurtsdag. Mitfiern deit Heiner Egge, en hoochdüütschen Schrieversmann, de sik allerbest bi den Mann ut Heid utkennen deit. He nimmt uns mit na Mentone an de Middellandsche See, dor an de Grenz twüschen Italien un Frankriek, wo Doris Groth 1876/77 ehr Krankheit utkureren schull.

Wi kennt de Dokumenten vun Doris un Klaus Groth. Ut dat, wat dor to lesen steiht, un ut dat, wat he op sien egen Reis 2018 an Indrücken opsammelt hett, knütt Heiner Egge en Romaan vull vun Poesie. Bavenan steiht nich, wat de Figuren beleven doot. Nee, dat geiht üm jümehr Sicht op de Welt. Dor speelt dat denn ok keen Rull, woneem de Realität ophöört un de Fantasie anfangt.

In den Text rinmengeleert hett de Schriever Stücken ut Breven un Gedichten – op Hooch un op Platt. Dat is dat Korsett. Man vun dor gifft dat so veel to entdecken. Mal philosophisch, mal psychologisch, un denn ok mal mit en Kalauer na Käptn Weenke sien Maneer: Dor speelt denn ok al mal de Havenmeister „Schiffe versenken“.

Heiner Egge: Winterreise in den Süden. Die Liebesgeschichte von Doris und Klaus Groth. Roman. Boyens : Heide 2019, 159 S.

ISBN 978-3-8042-1505-4