23.01.2020

Mit Spraak spelen

Gerd Spiekermann hett jümmers geern mal en Stück vun Tante Dibbermeier un all de annern Charakterköpp vördragen. Un nu hett he de besten Stücken vun Arnold Risch – de Mann is al 40 Johr doot – as Book nee rutgeven. En beten Hooch, en beten Platt – un bannig veel Missingsch.

Woso kann een düsse Riemels un Vertellen hüüt noch mit Freid un Gewinn lesen, wo sik de Alldag doch gewaltig ännert hett? Dat liggt woll an de Figuren, un de Sichtwiesen, mit de Risch vör Dag kümmt. Un een mütt sik ok wunnern, wo veel ok vundaag noch gellt: ”De Tieden sünd slecht, de Minschen sünd slecht, de Een beschummelt, de Anner hett Recht, de Een will düt, de Anner will dat, du argerst di blau un denn wedder swatt, de pumpt di an, von den kriggst du Geld – Nee, nee, goh mi af mit de hütige Welt!”

Een Tipp: De düsse Stücken leest, de schull dat mit de Ohren doon. Noch beter: An de Betonung so lang rümproberen, bet dat dat klingen deit as dat Leven sülvst. Un gauer as een dor mit rekent, is man Vördragskünstler.

Arnold Risch: Onkel Max is’ tot... Die besten Texte Hoch, Platt und Missingsch. Hrsg. v. Gerd Spiekermann. Quickborn-Verlag : Hamburg 2019, 119 S.

ISBN 978-3-87651-457-4