09.05.2017

Mit Pläseer

Dat hett nich mal een Johr duert – nu hett Manfred Briese al dat twete Book trecht. Wedder mit Vertellen un Gedichten. Sien Welt is uns Alldag. Dor kickt he sik de Lüüd an. Nipp un nau. He will weten, woans de ticken doot. Un denn maalt he dor Skizzen vun: Geschichten, de blots dat Leven vertellt.

Manfred Briese, he is jüst 75 Johr oolt worrn, geiht vun sik sülvst ut: Vun sien Lüüd, vun sien Kuntrei. He fraagt sik: Wat maakt mi Freid? Wat hollt de Familie tohoop? Woneem sünd de düüstern Sieden vun’t Leven? Un woans schafft wi dat, mit jüm ümtogahn? Wat maakt de Geföhlen ut en Minsch? Jeedeen Geschicht oder Gedicht is een Puzzlestück to dat, wat dat Leven in uns Tiet utmaken deit.

De Geschichten sünd in Oostfresen-Platt schreven. Vun de Oort her passt se in jeedeen Blatt oder Klenner – as lütte feine Vertellen. Man düsse Schrieversmann schull sik geern mehr totruen. Wo süht dat ut mit en Novell oder en richtige Kottgeschicht? De Fantasie dorto hett de Mann, un dat Handwarkstüüch ok.

Manfred Briese: Kattenschiet in Düüstern. Geschichten & Gedichten. Diesel Verlag (diesel@diesel-online.de) : Emden 2017, 216 S. ISBN 987-3-934835-33-7