18.07.2018

Levensbiller

Vele Johren lang hett Hugo Gehrt Geschichten vertellt un denn mit de Hand opschreven. Dor is nu en Book vun worrn: In 11 Stücken vertellt de Mann ut Stralsund ut sien Leven, un an’t Enn kümmt noch en Märken dorto. Alldag mit Arbeit un free’e Tiet – dor stickt wenig Kawumm binnen, man so is dat eben in’t richtige Leven.

Hugo Gehrt is eerstmal een, de vun dat Snacken her kümmt. Un so is dat keen Wunner, dat he bi’t Schrieven meist keen Komma un meist keen Afsatz kennt. För all Lesers heet dat aver: En mütt sik dor eerstmal böös rinfummeln – un Tiet mitbringen mütt een ok, denn düssen Verteller geiht so gau de Puust nich ut.

So en Leven an de Küst un in’t Binnenland, in de DDR un denn in Ganz-Düütschland kann nich in een Stremel dörlopen. Mag ween un dat, wat bi „Sprüche“ steiht, is de dialektische Wohrheit dorto: „Fröher gung uns dat got, hüt geit uns dat bärer – äwer dat wier wull bärer, wenn uns dat wedder good gung.“

Hugo Gehrt: As ümmer. Stralsund : Kruse 2017, 143 S.

ISBN 978-3-95872-042-8