19.03.2020

Lehrbook för MV

Vun de 7. Klass an köönt Schölers in Mäkelborg-Vörpommern Plattdüütsch as Schoolfach anwählen. So’n Kurs kann bet na dat Abitur wiederlopen. Nu liggt dat eerste grote Schoolbook för düssen Ünnerricht op’n Disch. Man na dat Lehrwark schüllt ok Lüüd Platt lehren, de an Kitas arbeidt.

Düsse Lehrgang hett sik veel vörnahmen: Spraakgeschicht, Grammatik, Leesstücken to’n Besnacken, dorto: Themen ut de Region, Traditschoon un Literatur. Man langt en Literatur-Ünnerricht mit Reuter, Brinckman, Tarnow? Un wat is mit Spraakgeografie un -soziologie? Nich allens löppt rund bi de Grammatik: Wat is Plusquamperfekt an: De Katt hett sik up dat Bett lecht? Kieken schull een ok noch mal, wat düsse Adverbien un Konjunktionen op Platt würklich bruukt warrt: allerdings, folchlich, demnå, insofiern, wiel, obwoll, obgliek.

Wolfgang Hohmann hett den Kurs in 13 grote Lexen op sowat 250 Sieden tohoopstellt. He nimmt de Schrievwies vun Renate Herrmann-Winter op. En Vörbild för all Schoolböker is dat Lay-Out vun Silke Herr.

 

Wolfgang Hohmann (Text), Silke Herr (Illustration): Platt mit Plietschmanns. Dat Plattdüütsch-Lihrbauk. Grundlagen, Grammatik, Gebrauch des Niederdeutschen. Hinstorff Verlag : Rostock 2019, 255 S.

ISBN 978-3-356-02201-8