20.04.2017

Küern un tohören

Woneem snackt de Minschen överhaupt Mönsterlänner Platt? An wat kann een de plattdüütsche Spraak in’t Mönsterland kennen? Wat för Oorten Platt gifft dat dor? Woveel Lüüd snackt Platt? Woans süht dat ut mit Platt in de Literatur oder in’t Theater?

Op so‘n Fragen gifft Markus Denkler in 15 kotte Artikel Utkunft: to’n Lesen, ok to’n Ankieken mit Biller un Landkoorten un sogoor to’n Anhören över QR-Codes.

Dat Book is so opboot, dat een dat geern in de Hand nimmt. In de Texten stickt veel an Gehalt binnen, man liekers sünd se so schreven, dat jeedeen jüm versteiht. Markus Denkler wiest, dat he sik in de Spraakwetenschaft utkennt un vör allen in de Geschicht vun de Spraak to Huus is. Wenn dat üm de Tallen geiht vun de Minschen, de Platt köönt, harr he aver villicht doch över den Rand vun den Töller rutkieken schullt.

Vun den Opdrift för Platt, de in de verleden 20 Johr in de nöördlichen Bunnslänner to marken is, is in Westfalen woll nich veel ankamen. So leest een vun en Spraak, de dat egentlich gor nich mehr geven deit un de ok keen Tokunft hett. Liekers: Denkler weet to vertellen. Töövt wi also af, woans dat mit de Reeg „Westfälische Mundarten“ wiedergeiht.

Markus Denkler: Das münsterländische Platt. (Westfälische Mundarten, Bd. 1). Hrsg. im Auftrag der Kommission für Mundart- und Namenforschung. Münster : Aschendorff 2017, 103 S. ISBN: 978-3-402-14344-5