22.06.2017

Köönt Se alleen opstahn?

Vun „Aufnahme“ un „Einstieg in die Biografie“ över „Informationen zur Befindlichkeit“ bet hen na „Diagnosen und Beschwerden“ un „Alltagstaugliche Kraftausdrücke“ – in düt lütte Heft finnt sik de wichtigsten Wöör un Utdrück, de een bruken kann, wenn een sik üm ole oder kranke Minschen kümmern deit.

Dat Plattdüütsch för de Pleeg vun öllere un kranke Lüüd en grode Rull spelen kann, dat weet meist jeedeen, de in düt Feld arbeiden deit. Un dat weet ok al en ganze Reeg Lüüd, de för de Utbildung vun junge Plegerinnen un Plegers verantwortlich sünd. Düchtig veel maakt un in Gang bröcht hebbt de Berufsbillen Scholen in den Landkreis Ollenborg. Dat lett, de sünd de Motor vun Platt in de Pleeg.

Un dor passt denn ok to, dat se sik dat Heft, dat se eerst vör dree Johr rutgeven hebbt, vun vörn bet achtern dörkeken hebbt. Ut 32 Sieden hebbt se 48 maakt. Nu is de Schrievwies klorer – dat is also ok eenfach to lesen. Un dor is ganz veel dortokamen, wat in de Kursen opfullen is. Bi de Fraag: „Hebbt Se goot slapen?“ steiht nu ok: „Hebbt Se ok dröömt?“

Platt in de Pleeg is hier keen modischen Schnickschnack, mit den een gau in de Zeitung oder in’t Feernsehn kummt. Nee, hier gellt dat as Arbeitsfeld, dat hoochnödig is un dat sik wiederentwickeln kann un mutt.

Plattdeutsch in der Pflege. Eine kleine Wortschatzbroschüre für Berufe im Gesundheitswesen: Alltagsbegriffe, Fachausdrücke, Redewendungen u.v.m. Überarb. Aufl. April 2017.

Kostenloser Download über: http://www.oldenburg-kreis.de/3061.html

Broschüren erhältlich über: plattdeutsch-pflege@remove-this.bbswildeshausen.de