22.05.2019

Kinnerfilm op Platt

Plattdüütsche Filme gifft dat blots en Handvull. Un Filme kannst an en poor Finger aftellen. Nu, wo wi frische Medien bruukt, wenn wi Platt mehr an junge Minschen ranbringen wüllt, markt wi eerst, wat hier allens fehlen deit. „Ritter Trenk“ maakt Moot op en plattdüütsche Film-Tokunft.

De Geschicht vun den lütten Jung, de vun to Huus lostreckt, üm Gerechtigkeit för sien Familie to kriegen, hett Kirsten Boie 2006 as Book rutbröcht, 2015 is denn de hoochdüütsche Film in de Kinos kamen. Un nu op Platt. De Stimmen sünd to hören vun Axel Prahl, Gerd Spiekermann, Jan Graf un vun en Reeg Kinner mit ünnerscheedliche Oorten Platt – so schall vun de Tohörers jeedeen sik wedderfinnen.

Achter dat Synchronisatschoons-Projekt stickt der Vereen „Platt und Friesisch in der Schule“, de hett ok dat Geld ranhaalt vun en Reeg Steden. De Dialogen sünd flott un passt vun de Spraak her in uns Tiet. De nich allens versteiht, kann sik an de hoochdüütschen Ünnertitel holen. En extra School-DVD kann in de Scholen wiest warrn.

 

Ritter Trenk op Platt. DVD. Hrsg. v. Platt und Friesisch in der Schule e.V.: 2019, 80 Min.

EAN 4042564149531