14.02.2020

Humor is ...

Dat also sünd de Utfeegsels ut Manfred Brümmer sien Humor-Schuuv. Wat sik bi em in de verleden 50 Johr an Geschichten, Riemels un Dööntjes ansammelt hett, dat hett he nu twüschen twee Bookdeckel inbinnen laten. Fründlichkeit un Striet, Dick un Dünn, Mann un Fro, Theaterwelt un Mäkelborg – jümmers vertellt mit Plie, Achtersinn un Minschenverstand. Vör allen aver: jümmers to’n Högen.

All Vörlesers un Dööntjevertellers warrt jümehr Freid an düt Book hebben. Ok wenn de Reimeleen blots in Mäkelborg to bruken sünd. Dat meiste steiht in de Traditschoon vun Bräsig un Tarnow. Bi enige Stücken steiht de Naam vun den Original-Autor mit bi (as Grasshoff, Welk, Heine, Tucholsky oder Erhard) – schaad, dat dat nich oplööst warrt.

Manfred Brümmer is ut de Theater- un de Radio-Szene in MV nich wegtodenken. To’n Book sünd siene Snibbels worrn vunwegen de Gestaltung un de grallen Biller, de UP Schwarz tostüert hett.

Manfred Brümmer: Schnick un Schnack ut 50 Johren. Plattdüütsch Geschichten, Riemels un Droenkram – sinnig, unsinnig un achtersinnig. Nordwestmedia Verlagsgesellschaft : Grevesmühlen o.J. [2019], 136 S.

ISBN 978-3-946324-27-0