05.03.2013

Heinrich-Schmidt-Barrien Pries 2013 geiht an Birgit Lemmermann

Birgit Lemmermann is de kreativste plattdüütsche Autorin in uns Tiet. Ehr Prosa is vull vun Fantasie, ehr Lyrik verbinnt depe Geföhlen mit Spraakkraft.

Vör allen aver: Birgit Lemmermann hett dat plattdüütsche Kinnerbook sien Rang geven. Ehre „Emil“-Böker gellt hüüt as Klassikers. Se sünd Grundlaag un Vörbild för all de annern Kinnergeschichten, de wi in de Hand nehmen köönt. Mit „Ebbe un Hehn“ hett se den eersten richtigen plattdüütschen Jugendroman schreven. Un to den Text hett se, jüst as bi „Emil“, ok de Biller sülvst dorto maakt.

Birgit Lemmermann hett Kraasch: Se schrifft över Saken, de dat vörher so op Platt noch nich geven hett. Se waagt sik wat, un se maakt dat goot. Man se steiht ok mit beide Been fast op de Eer. Un se weet, woneem se henhöört: Na de Gegend twüschen Werser un Elv.

Birgit Lemmermann steiht mit ehr Schrieven un ehr Persönlichkeit för de nee’e plattdüütsche Literatur, de in Tokunft noch veel to seggen hett.

1962 is Birgit Lemmermann in Ahlerstedt-Klethen op de Stader Geest op de Welt kamen; se is plattdüütsch groot wurrn. Abitur hett se in Buxthu maakt un in Kassel studeert, denn is se wedder torüch in den Noorden gahn. Nu arbeidt se al siet vele Johren as Lehrerin an dat Raatsgymnasium Rottenborg; se ünnerricht Kinner in Kunst, Warken, Sport un Plattdüütsch.

Anfungen to schrieven hett se för ehren Söhn, denn dat geev kene plattdüütschen Kinnerböker. Man gau hett se sik ok Geschichten för anner Kinner, för junge Lüüd un ok för grote Lüüd utdacht.

För ehr Schrieven hett se al en ganzen Barg Priesen kregen:

  • 2006 den eersten Pries bi den NDR-Wettstriet „Vertell doch mal“; 2007 un 2008 weern ehr Geschichten ünner de besten 25.
  • 2007 den Lüttjepütt-Pries un den Pries för dat Plattdüütsch Book vun't Johr för "Ebbe un Hehn"
  • 2013 den Heinrich-Schmidt-Barrien-Pries
  • 2008 den Freudenthal-Förderpries
  • 2009 den „Hans-Henning-Holm-Pries“ för dat Höörstück „Kaffeetafel mit Fleeg“
  • 2011 den „Klaus-Groth-Pries“ för Lyrik
  • 2012 den Freudenthal-Pries för „Ünner dat, wat baven liggt...“

 

Bibliographie:

  • Ut'n Leven von Emil
    Schintz Druck, 1994
    ISBN: 3-9801388-4-4
  • Ut de Kinnertiet von Emil
    Schintz Druck, 1996
    ISBN: 3-9801388-5-2
  • Wenn de Sünn mööd slapen geiht
    Schintz Druck, 2000
    ISBN: 3-9807132-8-8
  • Ebbe un Hehn
    Schünemann Verlag, 2008
    ISBN: 978-3-7961-1919-4
    ok as Höörbook: 5 CDs, ca. 360 Min.
    ISBN: 978-3-7961-1402-1
  • Avends an de Regentünn
    Schünemann Verlag, 2008
    ISBN: 978-3-7961-1920-0
  • De Deerten wüllt Pannkoken freten
    Jan Graf (Text) un Birgit Lemmermann (Illustration un Konzept)
    Schintz Druck, 2011
    ISBN: 978-3-9813-5981-7
  • Black Hex
    Schünemann Verlag, 2012
    ISBN: 978-3-7961-1000-9

 

Översetten:

  • De Oosterpoggen
    Matthias Sodtke
    In’t Plattdüütsche överdragen vun Birgit Lemmermann
    Schünemann Verlag, 2009
    ISBN: 978-3-7961-1936-1
  • Gift dat egens Brummers, de na Worteln smecken doot?
    Matthias Sodtke
    In’t Plattdüütsche överdragen vun Birgit Lemmermann
    Schünemann Verlag, 2009
    ISBN: 978-3-7961-1928-6
  • Schwerelos op Platt
    Ildikó von Kürthy
    In’t Plattdüütsche överdragen vun Birgit Lemmermann
    Schünemann Verlag, 2010
    ISBN: 978-3-7961-1960-6