28.08.2019

Gruselwettstriet un Kluntjekandis

In dat Dörp Büngelsbüll löppt nich jüst veel. Goot, dat dat de dree Bagaluten Swiebitje, Kungar un Görde geven deit. De wahnt tohoop mit jümehr Öllern in dat Reetdackhuus an de Gneterswartstraat. Dat dat Leven vun de lütten Bagaluten nich to langtöögsch warrt, dorför maakt se en Gruselwettstriet. Un se finnt in den Goorn allerhand to beschicken.

Bärbel Wolfmeier schrifft sik mit düssen eersten Band vun de Lütten Bagaluten direktemang in de Harten vun all de jungen un ölleren Lüüd, de Spaaß hebbt an Kinner, de in uns Tiet passt: kregel, ok mal kiebig, jümmers wat in Gang. In de Biller vun Angela Gstalter gifft dat en Barg to entdecken.

Dat Book is allerbest för de, de mit dat Lesen anfangt, man ok to’n Vörlesen un för Kinner, för de Plattdüütsch nee is. An’t End steiht en lütte Wöörlist. Dat Book is in en Sülvstverlag rutkamen - heet dat, dat de Schrieversch dor keen Verlag för funnen hett?

Bärbel Wolfmeier: Lütte Bagaluten – De Gruselwettstriet. Stekke-Wittenwurth : diekschoop verlag 2019, 62 S.

ISBN 978-3-96443-520-0