27.04.2017

Grote Kunst un lütte Muus

In de 1920er Johren wahnt in Hamborg en lütt Muus. De hett nix anners in’n Sinn as Flegen. An’t Enn hett se ehr flegen Kist trecht. Un mit de schafft se dat wiss un wohrraftig över dat grote Water na Amerika. Vörbild is Charles Lindbergh. Man wat Torben Kuhlmann dorvun maakt hett, dat hett Gesicht.

De Biller wiest uns en flietige Muus. Twüschen Schruven un Tähnrööd is se in Gang, in de Straten vun de grote Stadt, op den Bahnhoff un in ehr lütt Kamer. De Kunst liggt in den Blickwinkel – Bild för Bild bringt en gewaltig Spektakel, mit grote Geföhlen un heel veel to bekieken.

Torben Kuhlmann harr „Lindbergh“ 2012 för sien Examen maakt. Mittewiel hett he sien Platz in de düütsche Comic-Szene funnen. Dat Book is 2014 rutkamen – 2016 hett dat den Kinnerbookpries vun Nordrhein-Westfalen kregen. Un 2017 den Höörbook-Pries vun den Hessischen Rundfunk. De neeste Graphik Novel vun Kuhlmann heet „Armstrong“ – also: woans kummt de Muus op den Maand?

Dor is den Verlegger Vito von Eichborn för to danken, dat he för de plattdüütsche Version de Rechten inhaalt hett. En plattdüütschen Comic – lang nich blots för Kinner.

Torben Kuhlmann: Lindbergh op Platt. De gediegen Geschicht vun de Muus, de flegen kunn. In’t Plattdüütsche överdragen vun Reinhard Goltz. Vitolibro : Malente 2016. ISBN: 978-3-86940-038-9