21.02.2020

Glöven

Siene Radio-Andachten ut twintig Johr hett Hubert Looschen tohoopstellt. 130 lütte Wegwiesers för Lüüd, de sik nich seker sünd oder bang oder sik verkrupen wüllt. An de richt sik de Schriever ut Garrel in’t Ollenborger Mönsterland. Un he vertellt vun de Lüüd ut sien Gegend, vun fröher un vun nu. He vertellt vun de Natur un woans Minschen een mit den annern ümgaht. Un jümmers wedder is de Bibel sien Richtmaat.

Hubert Looschen is een vun de kathoolschen Plattsnackers bi de Radio-Reeg „Dat kannst mi glöven“, de bi NDR 1 Neddersassen löppt. He weer Schoolmester un is ok to’n Diakon weiht worrn. De Mann steiht mit beide Been op de Eer. Wat he vertellt, hett Hand un Foot, un dorüm bruukt he ok kene Pointen. Aver he dreiht de goden Sieden na baven: Geschichten to’n Moot-maken.

Dat Platt ut dat Ollenborger Mönsterland is vun den Klang her gor nich so wiet weg vun dat Noordneddersassische. Man de Schrievwies is denn doch wat gediegen. Schaad – denn so warrt düt Book woll blots in de Cloppenborger Gegend Lesers finnen.

Hubert Looschen: Du kanns un büs mehr, at du menns! 20 Johre „Dat kanns mi glööven“. Selbstverlag : Garrel 2019, 132 S.