08.06.2017

De Literatur hett ehr egen Geschicht

Een mutt sik doch wunnern, wat dat in de nee’e plattdüütsche Literatur na 1945 allens geven deit. De meisten kennt plattdüütsche Geschichten un Gedichten ut jümehr Gegend – man hier kaamt se vör Dag: Schrieverslüüd vun heel vele Kanten, de mit Plie un Spraakkraft ut Platt en Literatur-spraak maakt.

Kloor, de groten Namen sünd dorbi – vun Claudius över Bruhn un Schoon hen na Bellmann un Bühren. Man ok Romanschrievers as Boer, Wahrendorf oder Ohm. Opdeelt is de Tiet vun 70 Johr in fief Stremel. Un de Fraag is jümmers: Wat gifft dat an nee’e Themen? Un gifft dat en nee’e Oort, de Welt in Wöör to verpacken? Dat geiht aver nich blots över Literatur, man kann sik vun de Texten ok sülvst en Bild maken, wi leest, wat de Autoren över Platt oder över ehr Oort to schrieven meent. Un wi köönt nalesen, wat anner Lüüd över en Gedicht oder en Book schreven hett.

De beiden Bearbeiders leggt in 2 Bänn en Wark vör, na dat al faken ropen worrn is. Dat is so schreven, dat dat nich blots vun Lüüd ut de Wetenschaft to lesen is, man vun all, de wat mit plattdüütsche Literatur anfangen köönt. Dat Geld för den Druck hett de Bunnsbeopdragte för Kultur un Medien geven.

Dieter Möhn, Reinhard Goltz: Niederdeutsche Literatur seit 1945. Teilgeschichten einer Regionalliteratur. 2 Bde. Hildesheim : Olms 2016, 681 S. ISBN 987-3-487-15522-7