02.04.2020

CD mit Märken to’n Toluustern

Oostertiet is Hasentiet. De Haas, vun den Hans Meinen vertellt, sitt in en Boom un kann flegen. Noch twölf anner Geschichten, de meisten dorvun Märken, hett he opnahmen un dor en CD vun maakt. Twee Märken kennt wi vun Willem Wisser, denn is de dicke fette Pannkoken dorbi un Stücken ut Ungarn, Spanien, Norwegen oder Afrika.

Wenn de Deerten snackt un föhlt as de Minschen, kann bannig veel passeren. Sünnerlich, wenn een sik wat wünschen kann. Oder wenn een wat söken deit, as de Söhn vun König Ballerbüxbammelbüdel un Königin Teertunnentimpentüdel - de heet Kroonprinz Piepvagelfleutenfietje un finnt sien Bruut Snippsnavelsötensnuutje.

Hans Meinen, is al vele Johren de Plattdüütschbeopdragte in de Wersermasch. Dor hett he ok en Barg Börgerradio bi maakt un inöövt, wat een bi’t Geschichtenvertellen allens an Handwarkstüüch insetten kann: Gauer un langsamer, mit mehr Geföhl oder weniger, un den een oder annern Satz noch mal wedder opnehmen.

 

De Oosterhaas, de flegen kann! Geschichten un Märken van un mit Hans Meinen. Isensee Verlag : Oldenburg 2018, CD.

ISBN 978-3-7308-1485-7