05.03.2020

Blau för de twete Schoolklass

Na de Arbeitsböker för de Klassen 3, 4 un 1 gifft dat vun Edith Sassen nu ok dat Lehrwark för de twete Klass. Un se höllt Kurs: Hier gellt de Methoden vun den fröhen Frömdspraakünnerricht. In 7 Lexen (un en Extra-Lex to Daag in den Afloop vun’t Johr) geiht dat üm dat Alldagsleven vun Schoolkinner un woans dat op Platt utsehn kann: Dit un dat (Trüchkieken op dat eerste Johr) – To Huus – Tüüch – In’n Goorn (Tuun) – Mien Familie – Mien Liev – Up’n Buernhoff.

De enkelten Lexen sünd op een un desülvige Oort opboot. Dat gifft Sekerheit bi Schölers un Lehrers. Lesen un Schrieven speelt blots en lütte Rull, bavenan staht: Singen, Malen, lütte Stücke spelen oder Dialogen. Wichtig is de Arbeit mit de Wöör, de in ünnerscheedliche Formen jümmers wedderkaamt. Kloor is hier de Schoolpraxis ruttokennen.

Een weet ja, dat Platt överall en beten anners utfallt. För de meisten Gegenden aver gellt: In’t Präteritum steiht bi de schwachen Verben keen Suffix – also: he maak ‘er machte’. Hier aver warrt düsse Formen mit -de billt, as in speelde, wackelde oder wünschde. Vun dorher mööt de Schoolmesters bi düsse Texten naarbeiden.

 

Edith Sassen: Platt löppt. För de Lütten 2. Isensee Verlag : OIdenburg 2019, 73 S.

ISBN 978-3-7308-1514-4