13.06.2018

24 Stünnen

Dat 30. Mal is düt Johr de Wettstriet „Vertell doch mal“ lopen. He höört al lang to de plattdüütschen Klassikers mit to, un dat lett, as wenn Hunnerte Lüüd dor Johr för Johr op töven doot. 1400 Geschichten ut all Gegenden in Noorddüütschland sünd ünner dat Motto „Wat för’n Dag“ tohoopkamen – jeedeen mit en egen Angang un en egen Sicht op de Welt.

Afdruckt is de Eerste bi de jungen Schrieverslüüd, bi de „Ünner 18“, un denn de 25 Geschichten, de en Jury as de besten rutfunnen hett. Martina Krohm hett en Krimi schreven: Is allens anners as dat utsüht. Bi Birgit Rutenberg geiht dat üm Geschlechtsümwandlung: Ut Anna is Onno worrn. In Heiner Egge sien poetische Geschicht weet een nich: Wat is würklich, wat is Wunsch, wat is Drööm?

Dat eerste Mal gifft de Husum Verlag den Vertell-doch-mal-Sammelband rut. To all de Autoren gifft dat ok noch en lütten Levensbericht. Un 2019 heet dat bi den NDR un bi Radio Bremen wedder: Vertell doch mal.

Vertell doch mal! Wat för’n Dag. 26 plattdeutsche Geschichten. Hrsg. vom Norddeutschen Rundfunk, Landesfunkhaus Schleswig-Holstein mit freundlicher Unterstützung von Radio Bremen, dem Ohnsorg-Theater und der PNE Wind AG. Husum Druck- und Verlagsgesellschaft : Husum 2018, 124 S.

ISBN 978-3-89876-924-2